Najprjedy dalše wužiwanje tuchwilnych rumnosćow rjadować

Budyšin (SN/JaW). Serbska kulturna informacija (SKI) měła so po woli Załožby za serbski lud z rumnosćow Serbskeho domu zminyć. Zaměstnić chcedźa ju w ponowjenych rumnosćach Röhrscheidtoweje bašty na ležownosći Serbskeho ludoweho ansambla. Tole wobkrući Serbskim Nowinam direktor Załožby za serbski lud Marko Suchy na nowinarskej konferency po zašłym posedźenju załožboweje rady w Drježdźanach.

Dotal wšak njeje hišće rozsudźene, hač SKI scyła přeměstnja. „Tendenca w załožbowej radźe je spóznajomna. Po njej měła so kulturna informacija w bašće SLA zaměstnić“, Suchy potwjerdźi. Čakaja z rozsudom, dokelž njeje rjadowane, kak měli so dotalne rumnosće SKI w přizemju Budyskeho Serbskeho domu dale wužiwać. Tež zarjad a direktor załožby stej w naležnosći tróšku bjezradnaj. W Röhrscheidtowej bašće je nimale wšitko k zaměstnjenju kulturneje informacije spřihotowane, twarske dźěła pak hišće cyle dokónčene njejsu.