HZ Wulka Dubrawa/Minakał
– Sokoł Ralbicy/Hórki 0:7 (0:1)
Za hosći zasadźeni: Gloxyn – Matka, Wałda, B. Bjeńš, Šewc, Lulak, G. Kurjat, Korjeńk, S. Bjeńš, von Köding, T. Bejma, M. Kurjat
Minjeny pjatk wječor nastupichu koparjo Sokoła Ralbicy/Hórki z nimale kompletnym kadrom k prěnjej testowej hrě w Minakale přećiwo Hrajnemu zjednoćenstwu Wulka Dubrawa/Minakał. Trenar Thomas Schultz njeeksperimentowaše a daše wšitkich akterow přez cyły čas na jich pozicijach hrać. Wosebje wažne běchu jemu krótke přihrawki wot wrotarja k nadběhowarjej. To so Sokołam wosebje w prěnich 15 min. poradźi. Třiróžk Fabian Korjeńk, Stanij Šewc a Stefan Bjeńš staraše so wo dobry natwar a posłužowaše stajnje zaso Gabriela Kurjata w nadběhu. Tón pak dwě stoprocentnej šansy zapase. Jenički strašny konter hosćićela Gloxyn znješkódni (20.). Šewc a Korjeńk z rjanymaj třělwomaj tohorunja wuspěšnaj njeběštaj. Krótko do połčasa bu Stefan Bjeńš w šěsnatce foulowany. Jědnatku von Ködinga drje přećiwniski wrotar parěrowaše, Gabriel Kurjat pak steješe prawje a bul na to do wrotow zhłójčkowa (39.). Ze snadnym 1:0 dźěše do kabiny.