Ze 26 nowymi inscenacijemi NSLDź wopytowarjow wabi

Budyšin (SN/CoR). Dohromady 26 premjerow – z toho štyri hornjo- a dwě delnjoserbskej – skići Budyske Němsko-Serbske ludowe dźiwadło publikumej w nowej sezonje. „Smy hrajny plan ze­stajeli před pozadkom towaršnostneje změny, hdźež zhromadnosć a solidarita dźeń a bóle woteběratej, hdźež jednotliwc wosamoća a so boji swoje městno namakać“, rozłoži wyši hrajny nawoda NSLDź Stefan Wolfram dźens dopołdnja na nowinarskej konferency.

Nowu hrajnu dobu zahaja z dnjom wotewrjenych duri 10. septembra w dotalnych dźiwadłowych dźěłarnjach na Wjelećanskej, kotrež na kóncu sezony na Lubijsku dróhu přećahnu. Prěnja premjera budźe hornjoserbska inscenacija za dźěći „Čmjeła Hana chce pomhać“ 13. septembra w Chróšćanskej pěstowarni. Budźe to zdobom premjera za nowu elewku Katku Pöpelec. Delnjoserbsce předstaji samsny kruch tamna a mjeztym 41. elewka činohraj­neho studija NSLDź Katka Krygarjec klětu 3. meje.