Budyšin (CRM/SN). Druha městnosć koncertneho rjadu „musica nova sorabica“ běše minjenu sobotu Budyska Michałska cyrkej. W fokusu steješe moderna klasiska hudźba Serbow za pišćele, saksofon a klarinetu. Mjez jědnaće programowymi dypkami běchu tři po charakteru jara rozdźělne, a to „Žadanje mam po tebi“ Jana Cyža z Budyšina na kěrluš Juliana Eduarda Wjelana z lěta 1869, „La promesa“ Ulricha Pogody z Choćebuza na citat z 1. lista swj. Jana a „do_z“ Sebastiana Elikowskeho-Winklera z Berlina, kiž wuwza swoje ideje z wopisanja kwasneje hudźby přez Jana Arnošta Smolerja. Zo pak bychu někotre twórby wšěm připosłucharjam wobsahowje dosć zrozumliwe byli, poda pišćelowa šulerka Gloria Žurec z Róžanta krótki zawod.