Budyšin (SN/CoR). Wědomostnje pisać je to jedne. Zo zamóže pak tež swoju disertaciju – w LND runje wušłu knihu „Um der Wenden Seelenheyl hochverdient – Reichsgraf Friedrich Caspar von Gersdorf“ – čile předstajić, wo tym njeje dr. Lubina Malinkowa wčera wječor jeno swojeho lektora Michała Nuka, ale tež něhdźe 30 zajimcow w Budyskej Smolerjec kniharni přeswědčiła. „Gersdorf sam je wšo za to činił, zo tale kniha njewuńdźe. Wšako sej politiskeje brizancy dla žadaše, zo maja so jeho listy, akty a dokumenty spalić. Bě tuž ćežko puzzle zestajeć“, rozłoži hižo wjackróć wuznamjenjena cyrkwinska historikarka.