We wobłuku Serbskeho kulturneho lěta w Krajnej wědomostnej bibliotece Liberec­ wotewrěchu minjenu wutoru přehladku „KRABAT – Legenda abo woprawdźitosć“ , kotruž bě Serbski muzej Budyšin zhromadnje z towarstwom Socie­tas Amicuum Liberec organizował a z požčonkami podpěrał.

Liberec (CB/SN). Nimo zastupjerjow Budyskeho Serbskeho muzeja wobdźělichu so na wotewrjenju tež referent za kulturu a wukraj Domowiny Clemens Škoda, wuměł­caj Regina Herrmannowa a Jörg Tausch kaž tež genealog Hans-Jürgen Schröter. Dźiwadłowa skupina Spojaček z Libereca zahra na to klankodźiwadło po motiwach serbskeje powěsće.