Dwě nowej žurli Budyskeho filmoweho palasta stej tež dźak publikumej

Budyšin (SN/at). W Budyskim filmowym palasće móžachu sej lubowarjo kina swój film wčera prěni raz w nowymaj žurlomaj 6 a 7 wobhladać. Sčasom do hód a ze startom paska „Star Wars: Der Aufstieg Skywalkers“ je mějićelka Kieft & Kieft Filmtheater Sachsen GmbH dalši twarski wotrězk wotzamknyła a w domje ličbu kinowych žurlow wo dwě na sydom rozšěriła. Po třoch kategorijach městnow – standard, komfort a premium – su na 2D-žurli 652 městnow a jedne městno za chorobny stoł a 87 sydłow a dwě městnje za chorobny stoł na 3D-žurli 7.