Awful Noise, DeyziDoxs a DWS kaž tež fanojo na rjadowniskim zetkanju

Chrósćicy (cš/SN/bn). Pod hesłom „Rock’n’roll highschool“ poda so sobotu něhdźe 300 fanow twjerdšeje hudźby do Chró­šćanskeje wjacezaměroweje hale „Jednota“. Třeći raz wotměchu tam rockowy wječor wosebiteho razu. Tola město twjerdych metalowych zaklinčachu najprjedy raz za fanow rockoweje hudźby skerje hižo měrne, cunje zynki. Awful Noise zahaji swój koncert unplugged, potaj­kim na zwjetša akustiskich instrumentach. Běše to prěni wustup skupiny po dlěšej přestawce. Posledni raz bě wona před sydom lětami na jewišću stała. Za sobotny wustup je sobuzałožer skupiny Syman Pětr Cyž nimo znatych čłonow a kolegow kaž Tina Dernehla, Jurja Wjenka a Alexandera Knoblocha tež młód­šich hudźbnikow angažował. Tak přewodźachu jich bratraj Józef a Jurij Hantuš na huslach resp. na cellu a Syman Hejduška na bijadłach. Po krótkej přestawce slědowachu jako wosebita překwapjenka wjacore přidawki w zwučenym zwukowym šaće za Awful Noise, potajkim z połnej paru.