Lipsk (SN/pdź). Wotnětka smědźa so Lipšćanscy serbscy studenća zaso w swojej „Centrifuze“ zetkawać. „Centrifuga“ je klubowa rumnosć w studentskim bydlenskim domje „Handrij Zejler“ na Arna Nitzschowej w Lipšćanskej štwórći Lößnig. Tam bydla na sedmym a wosmym poschodźe přewažnje Serbja. K „Centrifuze“ na wosmym poschodźe maja tuž jeničce woni a přećeljo přistup. W zašłych měsacach pak bě tež hłowne zetkawanišćo studentskeho towarstwa Sorabija Lipsk koronapandemije dla zawrjene.
„To bě wězo chětro škoda. Wšako so tam w normalnym padźe prawidłownje zetkawamy, zhromadnje swjećimy a swoje zarjadowanja planujemy kaž tež přewjedujemy“, informuje Michał Donat, předsyda Sorabije. Jeje tradicionelnej zarjadowani w lěćnym semestrje – chodojtypalenje a mejemjetanje – dyrbjachu tuž lětsa wupadnyć dać. Swoju hłownu zhromadźiznu njepřewjedźechu Sorabičenjo po zwučenym wašnju w Serbskim internaće, ale pola Donatec w Chrósćicach. Zasadnje wšak bě w tym semestrje stajnje mało serbskich studentow w Lipsku. Wjetšina z nich je móžnosć online-studija z Łužicy sem wužiwała.
