Koparkow a koparjow na małym polu, potajkim w starobnej klasy F (9/10 lět), E (11/12 lět) a D (13/14 lět) maja serbske sportowe towarstwa dosć. Zahoritosć za kopańcu je w tej starobje hišće njesměrnje wulka. Hdyž pak so čas na wulkim hrajnišću bliži, so tón abo tamny kopar nadobo tohodla sporta wzda. Tež trenarjow je dźeń a mjenje.
Před 15 do 20 lětami njebě hišće trjeba hrajne koparske zjednoćenstwa wutworić, dźensa pak ma nimale kóžde koparske towarstwo na wokrjesnej runinje partnerske mustwo – a to primarnje pola juniorow. Přičina je hižo dlěši čas znata. Na wulkim polu prosće 15 do 20 hrajerjow hižo nimaja, kotřiž su hladajo na cyłu sezonu trěbni. Tohodla su minjenu sezonu štyri serbske towarstwa pola młodźiny C, B a A tajke hrajne zjednoćenstwo wutworili. Su to ST Marijina hwězda, SJ Chrósćicy, SJ Njebjelčicy a Sokoł Ralbicy/Hórki. Serbske koparske towarstwa so tak nadźijeja, zwólniwych hrajerjow dale wukubłać a potom tež pola muži witać móc.