Budyski Serbski muzej zhladuje na měšanu bilancu 2020
Budyšin (SN/CoR). Połojca mjenje hosći a jeničce třećina zarjadowanjow porno lětu do toho – to je ryzy kwantitatiwna bilanca Serbskeho muzeja Budyšin za lěto 2020. „Wosebje prěni lockdown wokoło jutrow je so wuskutkował. Wšako přińdźe najwjace wopytowarstwa w běhu lěta na jutrownu wustajeńcu, kotruž ani dypkownje wotewrić njemóžachmy, a z njej zwisowace dźěłarnički a programy“, rozłožuje muzejowa direktorka Christine Boguszowa. Dohromady 7 180 wopytowarjow a 68 zarjadowanjow loni mějachu. Wjerški běchu finisaža „My smy moda“ we wobłuku wustajeńcy „SORBIAN STREET STYLE“ spočatk lěta, jutrowna wustajeńca ze serbskim wuměłcom Marijom Ošiku kaž tež wotewrjenje wustajeńcy „Barby daliny – moler Ante Trstenjak a Łužiscy Serbja“ w septembrje z hosćimi z wukraja.
