SLA planuje předstajenje pod hołym njebjom a prózdninske lěhwo
Budyšin (SN/bn). Najebać dale njewěstu situaciju w zwisku z pandemiju a z toho slědowace ćeže, nastajić konkretny terminowy plan, přihotuje Serbski ludowy ansambl sep nowych inscenacijow a projektow. Najnowši poskitk rěka „Prózdniny z twojim instrumentom“. Wot 19. do 23. oktobra změja šulerki a šulerjo 5. do 8. lětnika składnosć, „z dźěćimi a młodostnymi z cyłeje Łužicy pod profesionalnym nawodom hudźbnikow SLA hudźić“, kaž zdźělenka ansambla připowědźa. Mjez druhim maja w tym wobłuku ekstra spisanu kompoziciju nazwučować a publikumej předstajić. Nimo toho wuhotuja wobdźělnikam „wotměnjawe popołdniše programy“.