Strategije zwičnjenja a wusměrjenja ćežišći nalětnjeho zetkanja Łužycafilm

Budyšin/Choćebuz (SN/bn). Serbsko-Němska filmowa syć Łužycafilm wuhotuje dwójce wob lěto zetkanje swojich čłonow, a to stajnje nalěto we wobłuku Filmoweho festiwala Nysa (FFN) a nazymu we wobłuku Choćebuskeho filmoweho festiwala (CFF). Byrnjež NFF tež lětsa pandemije dla na nazymu přestorčili, je syć minjeny kónc tydźenja swoje dwu­dnjowske zeńdźenje na zwučenym terminje wotměła, wospjet jako ryzy digitalne zarjadowanje.

Ze zahajacej dźěłarničku „Dohlad do swěta animacije tworjacych“ předstaji Annegret Richter, jednaćelka němskeho branšoweho zwjazka AG Animationsfilm, něhdźe 25 wobdźělnikam wjelorakosć tak mjenowanych trikowych filmow. „Lěpšina animěrowanych paskow je, zo njehrajetej čas a městnosć žanu rólu, wšitko je móžno. Njelěpšina je, zo wobhladuja tajke filmy často jako twórby předewšěm za dźěći. Nimo toho mamy hustodosć situaciju, zo rěka: ‚To tla nichtó widźeć nochce‘, čehoždla ludźom potom składnosć pobrachuje, sej je scyła wobhladać móc.“