Třeći raz wotměwa so forum młodych akademikarjow-sorabistow

Budyšin (SN/CoR). Młodźi akademikarjo-sorabisća so wot dźensnišeho hač do soboty digitalnje schadźuja, zo bychu nazhonjenja wo swojich aktualnych slědźenjach mjez sobu wuměnjeli. Po lětomaj 2017 a 2019 je to třeći raz, zo Serbski institut wědomostny dorost na zetkanje přeproša. Tónraz je nimo organizatorow-moderatorow dr. Theresy Jacobsoweje, dr. Roberta Lorenca a dr. Lubiny Malinkoweje ze stron instituta dohromady 19 slědźerjow z Nižozemskeje, Čěskeje, Pólskeje a Němskeje wobdźělenych. Přednoški su w delnjo- a hornjoserbšćinje, jendźelšćinje a němčinje. Štyri studentki geografije z Hamburgskeje uniwersity su dźens dopołdnja z rozprawu wo swojim slědźerskim projekće wo serbskim kreatiwnym dźěle před pozadkom strukturneje změny koło dohromady třinaće referatow zahajili.