Šćežka Ćišinskeho přeproša na pućowanje po žiwjenju Jakuba Barta
Hižo stajnje móžeš so w Pančicach-Kukowje najlěpje ze žiwjenjom a skutkowanjom Jakuba Barta-Ćišinskeho zeznajomić. Tu su ródny dom, twarjenje, hdźež je do šule chodźił, pomnik w Lipju, hłowna dróha a šula z jeho mjenom, w šuli wopomnišćo a w susodnym Wotrowje jeho row. Wšitke tele městnosće zwjazuje wot njedawna Šćežka Ćišinskeho. Po njej kročo móža sej wšitke starobne skupiny jednoho z najsławnišich serbskich basnikow spřistupnić a jeho zdźěla cyle hinak dožiwić, hač běchu to snano w šuli nawuknyli.