Lětnje dźiwadło pod hołym njebjom z wobšěrnym ramikowym programom
Budyšin (SN/bn). „Smy přewšo zwjeseleni, zo móžemy 25. Budyske lětnje dźiwadło skónčnje zwoprawdźić. Byrnjež sej wobstejnosće wěste wobmjezowanja žadali, budźe móžno tu derje a rjenje hrać“, rjekny intendant Němsko-Serbskeho ludoweho dźiwadła Budyšin Lutz Hillmann we wobłuku wčerawšeje nowinarskeje konferency na Hrodźe. Wot 24. junija hač do 8. awgusta chcedźa tam inscenaciju „Sherlock Holmes a paski Beatlesow“ cyłkownje 38 króć předstajić. Dwě třećinje dohromady něhdźe 21 600 zastupnych lisćikow stej hižo předatej.
„Sherlock Holmes je jara popularna figura. Bě načasu ju na tymle jewišću pokazać. Smy jednanje w pózdnich 1960tych lětach zapołožili, štož nam zmóžnja tehdyšu modu a hudźbu wobkedźbować. Spěwy Beatlesow tworja takrjec přestrjenc jednanja“, rozłoži Hillmann, zdobom awtor hry a režiser inscenacije. Hinak hač loni připowědźene pak njeje stawizna w Budyšinje zaměstnjena – to wobchowaja sej za druhi dźěl klětu.
