Na rasistiske nadpady we Wojerecach dopominać

srjeda, 15. septembera 2021
artikl hódnoćić
(0 )
W septembrje 1991 je hač do 500 ludźi hospodu za hóstnych dźěłaćerjow a bydlenski dom za požadarjow azyla we Wojerecach nadpadnyło. Policija njebě tehdy kmana, nadpady zakónčić.   Foto: pa/centralny wobraz W septembrje 1991 je hač do 500 ludźi hospodu za hóstnych dźěłaćerjow a bydlenski dom za požadarjow azyla we Wojerecach nadpadnyło. Policija njebě tehdy kmana, nadpady zakónčić. Foto: pa/centralny wobraz

Wojerecy (SN/CoR). Před 30 lětami su ludźo we Wojerecach dom za hóstnych dźěłaćerjow a tón za požadarjow azyla nadpadli. Wobrazy rasizma su so po cyłym kraju rozšěrili. Bě to tehdy započatk wjacorych rasistiskich nadpadow na wuchodźe a zapadźe Němskeje. Mjena Wojerecy, Rostock, Mölln a Solingen stachu so ze synonymami za prawicarsku namóc spočatk 1990tych lět. Zahajenske zarjadowanje wopomnjenskeho kónca tydźenja „Wojerecy 1991 – dopomnjenki, dopóznaća, per­spektiwy“ zhladuje tuž na pogromy we wjetšim cyłoněmskim konteksće a praša so za přiměrjenym wopominanjom.

Na podijowej rozmołwje „Wojerecy – Rostock – Mölln – Solingen“ nochcedźa potrjecheni tehdyšich nadpadow a zastupjerjo mjenowanych štyrjoch městow 17. septembra we Wojerowskej Łužiskej hali jenož podawki rysować, ale tež tři lětdźesatki dopomnjeća reflektować. Zajimcy njech so pod adresu přizjewja. Zdobom zahaja ze zarjadowanjom tež interkulturne tydźenje w Budyskim wokrjesu, kotrež so lětsa temje „Hóstne dźěło w NDR“ wěnuja.

wozjewjene w: Kultura
Prošu přizjewće so, chceće-li komentar podać

Serbska debata

nowostki LND