Budyšin (CRM/SN). „Prózdniny z twojim instrumentom“ – pod tutym hesłom přebywaše třinaće holcow a hólcow 5. do 8. lětnika wot minjeneje wutory hač do soboty w Budyskej młodowni blisko domu Serbskeho ludoweho ansambla. Tam mějachu woni kruće strukturowane dny, nic jenož ze wšelakimi poskitkami wuměłskeho wobłuka SLA, ale předewšěm tež wšědnje wjacore proby pod nawodom serbskeju naslědneju hudźbneju pedagogow Christiany Bukec a Jana Brězana.
Sobotu wuhotowachu młodźi hudźbnicy pod dirigatom swojich nazwučowarjow a z korepetitorku Ginu Hentsch na žurli Budyskeho Serbskeho domu hodźinski zjawny koncert. W nim wopodstatnichu prawosć zwěsćenja intendanta SLA Tomaša Kreibicha-Nawki, kiž praji při witanju, zo běchu to „přewšo intensiwne dny. Dźakuju so staršim, zo su nam swoje dźěći dowěrili“.