Wulke Hendrichecy (SN/bn). 19. Nysowy filmowy festiwal (NFF) je zakónčeny. We wobłuku swjatočneje ceremonije zawčerawšim w Habrachčanskim filmowym dźiwadle bu němskej produkciji „Altri Cannibali“ režisera Francesca Sassaija „Rybička Nysy“ za najlěpši hrajny film spožčena. Myto za najlěpši hrajerski wukon přiznachu Walterej Giroldnijej, wukonjacemu hłownu rólu w samsnym pasku. Dalše „Rybički“ zdobychu sej čěska produkcija „Kdyby radši hořelo“ za najlěpši scenowy wobraz kaž tež za najlěpši originalny scenarij a pólski pask „Gdy kwiaty nie milcza“ we wobłuku „dokumentacija“ a tohorunja pólska produkcija „Puszcza: Dyptyk“ w kategoriji „krótkofilm“. Publikumowej myće spožčichu čěskej historiskej dramje „Poslední závod“ a němskemu krótkofilmej „Mona & Parviz“. Specialne myto filmoweho zwjazka Sakskeje přiznachu ukrainskej produkciji „Klondike“.
NFF wuhotowace Wulkohendrichečanske towarstwo Kunstbauerkino zliči cyłkownje něhdźe 4 500 přihladowarjow.