Ludźo z cyłeho swěta chcedźa serbsce wuknyć
Budyšin (SN/CoR). Wšitke městna dwutydźenskeho mjezynarodneho lětnjeho kursa za serbsku rěč a kulturu Serbskeho instituta, kotryž započnje so jutře wječor w Budyšinje a traje hač do 6. awgusta, su wobsadźene. 51 wosobow wjeseli so hižo na wopyt we Łužicy. Zajimcy přińdu z Benina, Čěskeje republiki, Francoskeje, Italskeje, Japanskeje, Pólskeje, Ukrainy, USA a wězo tež z Němskeje. Prěni króć přileći cyła skupina potomnikow serbskich wupućowarjow z Texasa na kurs. Wosebitosć je tohorunja, zo wobdźěla so wjacori Kašubojo na dwutydźenskim poskitku.