Hišće žane serbske zarjadowanja na 9. dnju Hornjeje Łužicy

Budestecy (SN/CoR). Z wjace hač 27 zarjadowanjemi na 22 městnach wotměwa so wot 12. do 28. awgusta 9. dźeń Hornjeje Łužicy. Předsydka zarjadowarja Zwjazk Lusatia – Domizniski zwjazk Hornjeje Łužicy dr. Gabriele Lang je z dotalnym stawom přizjewjenjow spokojom. „W minjenymaj lětomaj bě wothłós korony dla skerje wobmjezowany, nětko pak so zaso mnozy z poskitkom wobdźěleja. Čas zarjadowanjow wokoło poprawneho Dnja Hornjeje Łužicy, 21. awgusta, je lětsa tak dołhi kaž ženje do toho a wopřimje tři kóncy tydźenja“, wona zwěsći. Wosebity datum 21. awgusta poćahuje so na dźeń załoženja Hornjołužiskeho zwjazka šesćiměstow 1346.