Kamjenc (SN/MaC). W rjedźe „Pišćele w pjećich“ w Kamjenskej Marijnej cyrkwi zahra minjenu sobotu młody serbski hudźbnik, organist a komponist Feliks Brojer twórby serbskich a dalšich komponistow, kotřiž so ze serbskej hudźbu zaběraja. K lětušim 200. narodninam Korle Awgusta Kocora je Feliks Brojer do swojeho koncertneho programa zapřijał trans­kripciji dweju chórow z oratorija „Israelowa zrudoba a tróšt“ a wot młodeho ameriskeho komponista Carsona Coomana prapremjeru tak mjenowaneho Sorbian Prelude „Rjana Łužica“. W nim cituje Cooman we wšelakorych fasetach melodiju našeje hymny přijomnje lochko a napadnje bjez patosa.

Dale zaklinčachu Jana Pawoła Nagelowe „Wariacije na serbsku Jurjowu legendu“ kaž tež „Serbska fantazija“ wot Thorstena Benedikta Schwarteho a swójska kompozicija Brojera – třidźělna „Serbska pišćelowa sonata“ na česć zbóžneho Alojsa Andrickeho.