Wot 1. awgusta je bywša muzejowa pedagogowka Maria Schöne nowa nawodnica Hórnikečanskeje Energijoweje fabriki. Wona přewza zastojnstwo wot Kirstin Zinke, kotraž je so powołansce přeorientowała.

Po studiju architektury bě Maria Schöne we wopušćenej salpetrowej fabrice a susodnym „Salpeterowym měsće“ Chacabuco w Atacama-pusćinje w Chile takrjec jako muzejowa pedagogowka skutkowała. Na to je wona na Hórnistwowej akademiji w Freibergu swój masterski studij industrijneje kultury wuspěšnje zakónčiła. Wot 2019 dźěła w Energijowej fabrice, kotraž nima po jeje měnjenju jenož stawizny zachować, ale tež do přichoda zhladować. K temam energijowa změna, klimowa a strukturna změna maja za šulerki a šulerjow tohodla formaty kaž energijowy camp, kotrež tam dale wjedu.