Na titulu serbskeho kulturneho časopisa wuhladamy wobraz „Dypki“ Mateja Dźisławka. Je to dźěl projekta „Studijo Lipsk“, za kotryž spožči so jemu lětsa při wubědźowanju „Simul+ – čiń sobu“ myto w kategoriji „Łužica – žiwa dwurěčnosć“. Dale wozjewi so dalši přinošk Evelyn Fiebiger we wobłuku serije wo serbskich chowancach Krajnostawskeho wučerskeho seminara w Budyšinje. Tutón króć wěnuje so wona Handrijej Wujancej (1814–1877). Na přikładomaj Bjarnata Krawca a Marjany Domaškojc rysuje Ladislav Futtera w swojim nastawku, kak su so serbscy wuměłcy w prěnjej Čěskosłowakskej republice zaznawali. Při tym złožuje so hłownje na žórła z Mladeje Boleslavy a přińdźe k facitej, zo hraješe přisłušnosć k serbskej ludowej kulturje pola wuměłcow wjetšu rólu hač jich konkretne wuměłske tworjenje. Nimo toho su tři recensije wozjewjene: Christoph Sramek pisa wo koncerće gitaroweho duwa Stefana Conradija a Bernda Gehlena w Podstupimje, hdźež předstaji so mjez druhim kompozicija Jana Cyža.