Zły Komorow (kap/SN/bn). „Zahrodowe město“, zetkawanišćo a galerija Marga w Złokomorowskim měšćanskim dźělu Brězk (Brieske) běchu wospjet z atmosferisce hodźacym so hosćićelom mjeztym hižo 10. łužiskeho festiwala lyriki. Składnostnje jubileja bě sej zarjadowar, towarstwo Dorostowy literarny centrum „Pisam“, dohromady něhdźe 40 poetow a poetkow, spěwytwórcow, hudźbnikow a tworjacych wuměłcow z cyłeje Němskeje přeprosył, zo bychu wot minjeneho štwórtka hač do předwčerawšeho narodniny swjedźensce wuhotowali. Serbski podźěl bě tež lětsa po zwučenym wašnju dosć prezentny.

Štwórtk zahaji „zažrany čitar“ Raz festiwal z klankodźiwadłowym předstajenjom „Lyrika njeje ničo ke chłóšćenju“. Pjatk slědowachu čitanja čłonkow a čłonow Złokomorowskeho kružka awtorow „Kostrjanc“. Sobotu čakachu wjacore dźěłarnički, kaž na přikład „Knihićišć po wašnju Gutenberga“ a „Poezija a kaligrafija“ na zajimcow; na cyłkownje štyrjoch jewišćach prezentowachu so najwšelakoriši awtorojo ze swojimi basnjemi, kotrež sahachu wot přewšo „klasiskich“ wjeršow hač k najeksperimentelnišim formam.