Wot spočatka oktobra budźe direktor Serbskeho instituta (SI) dr. Hauke Bartels profesor za sorabistiku Drježdźanskeje techniskeje uniwersity (TUD). Wčera přijima Bartels wotpowědne wopismo z rukow rektorki TUD, prof. Ursule M. Staudinger. Nawodnistwo SI pak wostanje jeho hłowny nadawk.

Drježdźany/Budyšin (SN). „Sorabistika skići šěroke a zajimawe slědźenske polo. Tute njemóže jenož Drježdźansku slawistiku wobohaćić, ale tež zajim studowacych zbudźić – tež hladajo na praktiske nałožowanje přiswojeneje wědy, na přikład w nowym masterskim studiju ,Digital humanities‘“, Bartels podšmórny. Nowopowołany profesor budźe w Instituće za slawistiku TUD wuwučować. Wědomostnej ćežišći stej digitalna sorabistika kaž tež rěčespyt za mjeńšinowe rěče, wosebje za delnjo- a hornjoserbšćinu.