Wosebita wustajeńca jako zazběh mjezynarodneho projekta
Budyšin (SN/bn). „Wšo je krajina – Alles ist Landschaft – Wšykno jo krajina – Wszystko jest pejzażem“ rěka nowa, wosebita wustajeńca, kotraž pokazuje twórby Jana Buka składnostnje jeho lětušich 100. posmjertnych narodnin a kotraž bu předwčerawšim w Budyskim Serbskim muzeju swjatočnje wotewrjena. Titul wotbłyšćuje „konsekwentne wuhotowanje přehladki w štyrjoch rěčach, mjenujcy w hornjo- a delnjoserbšćinje, němčinje a pólšćinje“, kaž direktorka wustajenišća Christina Boguszowa wuzběhny. Tele postupowanje „wotpowěduje zrozumjenju najwuznamnišeho tworjaceho serbskeho wuměłca přitomnosće, kiž wobhladowaše Łužicu jako jenaku, kiž tworješe po cyłej wuchodnej Němskej a kiž započa swoje wuměłske skutkowanje we Wrócławju.“
W mjenje Sakskeje statneje kenclije gratulowaše dr. David Michel Boguszowej „najprjedy raz k połnej žurli“ a podšmórny, zo je „wustajeńca z wulkotnym přikładom za kulturnu wuměnu mjez susodami“.