Wjelorakosć tworjenja Kita Lorenca sposrědkowali

wutora, 04. oktobera 2022
artikl hódnoćić
(0 )
Róža Domašcyna, Měrćin Wjenk, Měrana Cušcyna a Franc Šěn (wotprawa) wědźachu šibałosć Kita Lorenca na zhromadnym čitanju sposrědkować.  Foto: SN/Hanka Šěnec Róža Domašcyna, Měrćin Wjenk, Měrana Cušcyna a Franc Šěn (wotprawa) wědźachu šibałosć Kita Lorenca na zhromadnym čitanju sposrědkować. Foto: SN/Hanka Šěnec

Budyšin (SN/bn). Čitanje pod hesłom „Interview młodeho wědomostnika ze starym basnikom“ składnostnje pjatych po­smjertnin Kita Lorenca njebě jenož zakónčenje hłowneje a wólbneje zhromadźizny towarstwa Přećeljo Smolerjec ­kniharnje (SN informowachu), ale zdobom literarna chłóšćenka za něhdźe 30 zajimcow ze sepju skerje njeznatych tekstow wuznamneho serbsko-němskeho spisowaćela. W předawanišću na Budyskej Pchalekowej předstajichu čłonki ­a čłonojo towarstwa wuběr prozy, lyriki kaž tež literarnowědnych přinoškow Lorenca. Róža Domašcyna a Měrćin Wjenk wobswětlištaj mjez druhim z wurězkami dźenikowych zapiskow swójbne stawi­zny awtora. Dr. Franc Šěn a Měrana Cušcyna předstajištaj wjelorakosć Lorenca tež jako „wudawaćela, přełožowarja, dra­matikarja a publicista“ na přikład z ně­hdy w Rozhledźe wozjewjenym nekrologom za Jana Bobrowskeho a z „Bajku po islandskim wašnju“. Teksty běchu wušiknje zestajane, tak zo so publikumej wuwědomi, štož bě Cušcyna připowědźiła: „Lorenc je swoje teksty wobstajnje dale wobdźěłał a je zdźěla z prozy do lyriki a nawopak přetworił.

wozjewjene w: Kultura
Prošu přizjewće so, chceće-li komentar podać

Serbska debata

nowostki LND