Pjaty raz přeprošuje Budyski dźiwadłowy festiwal „Witajće druhdźe“
Budyšin (SN/CoR). Prěni raz chce Thespis-centrum při Budyskim Němsko-Serbskim ludowym dźiwadle we wobłuku lětušeho 5. festiwala „Witajće druhdźe“ Myto wobydlerkow a wobydlerjow přepodać. Wuznamjenić chcedźa dohromady dźesać ludźi, kotřiž „wšědny dźeń wusahowace zdokonjeja“. Pod hesłom „HeimaTraum“ přeprošuja wot 19. do 23. oktobra znowa na festiwal, na kotrymž steji tónraz wójna w Ukrainje w srjedźišću a tajke uniwersalne prašenja kaž: Kak chcemy z ludźimi wobchadźeć, kotřiž su do Němskeje ćeknyli? Što móžemy z aktualneho konflikta wuknyć? Što nam domizna woznamjenja? Što nas zwjazuje?
