Młodźi akterojo wuhotuja spěwohru „Z Tobu – Bohu swjećene lěto“

Chrósćicy (SN/bn). „Horca faza“ za přichodny wulki wjeršk serbskeho předstajaceho wuměłstwa je zaběžała. Dohromady něhdźe 140 holcow a hólcow resp. młodostnych z bjezmała wšitkich hornjołužiskich serbskich katolskich wosadow, ale tež z Drježdźan a z ewangelskich kónčin, w starobje wot wosom do 14 lět, je hižo nimale poł lěta pilnje zwučowało. We wobłuku wosebiteho castinga buchu wuzwoleni, zo bychu pjatk, 21. oktobra, spěwohru „Z Tobu – Bohu swjećene lěto“ w Chróšćanskej wjacezaměrowej hali „Jednota“ prapremjernje předstajić móhli. Wosebitosć inscenacije je, zo wu­konjeja młodźi akterojo nimale wšitke nadawki na jewišću kaž tež za a před nim sami. Tele dny filuja we wobłuku cyło­dnjowskich probow na poslednich de­tailach.