Budyšin (SN/bn). Hnydom štyri aktualne zběrki lyriki Milana Hrabala tworjachu zakład čitanja pod hesłom „Basnje w šěsć rěčach“ wčera w Budyskej Smolerjec kniharni. Prěnja předstajena publikacija bě zdobom najnowša. Wona wopřijima cyklus „Po puću bolosće a wěry“, z kotrymž Hrabal křižowy puć poetisce wotbłyšćuje, w originalu a w přebasnjenjach w hornjo- a delnjoserbšćinje, jendźelšćinje, němčinje a pólšćinje. Po słowach awtora je kniha „wuslědk poprawom žortnje měnjeneho namjeta Alfreda Měškanka“, kiž bě cyklus do delnjoserbšćiny přełožował a dalše přebasnjenja nastorčił. Tuž je zběrka tež „pomnik za mjeztym nažel njeboh Měškanka. Dźakuju so přełožowarjam, Wernerej Měškankej za redakcionelne dźěło, Róži Domašcynej za zestajenje, Smolerjec kniharni a Zwjazkej serbskich wuměłcow za organizaciju knižneje prezentacije a nic naposledk Spěchowanskemu towarstwu za serbsku rěč w cyrkwi, kotrež knihu wudawa.