Drježdźanska „Nóc serbskeje poezije“ z najstaršej kaž tež najnowšej lyriku
Drježdźany (SN/bn). „Dny poezije k 14. Drježdźanskemu mytu lyriki“, kotrež buchu minjeny štwórtk w sakskej stolicy zahajene, su zakónčene. Po „finalnym čitanju“ přizna wěcywustojna jury minjenu njedźelu čěskemu basnikej Pavelej Novotnemu hłowne wuznamjenjenje. Publikumowe myto zdoby sej Paul-Henri Campell. Program literarneho swjedźenja wopřijimaše nimo čitanjow mjez druhim sympozije a dźěłarnički kołowokoło přełožowanja resp. přebasnjenja poezije kaž tež 6. fachowy zjězd poetiki, lětsa pod hesłom „Basnistwo w słowjanskich rěčach“. Na zhromadnym zarjadowanju towarstwow Syć lyriki a Literarna syć Drježdźany, iniciatiwy Němskeho přełožowarskeho fondsa TOLEDO – Přełožowarki a přełožowarjo we wuměnje, Čěskeho literarneho centruma a Doma Ericha Kästnera za literaturu přednošowachu, recitowachu, diskutowachu a hudźachu mjez druhim Milan Šedivý, Jan Škrob, Róža Domašcyna a spěwarka Die Hermann.