Tradicionalny adwentny koncert 1. serbskeje kulturneje brigady

Budyšin (SN/bn). Tradicionalny adwentny koncert 1. serbskeje kulturneje brigady je předwčerawšim sta wopytowarjow w połnje wobsadźenej Budyskej cyrkwi Marje a Marty zahorił. Pod nawodom cyrkwinskeho hudźbneho direktora na wuměnku Friedemanna Böhme zaspěwachu šulerki a šulerjo Serbskeho gymnazija Budyšin (SGB) sławnu hodownu missu „Česká mše vánoční“ Jakuba Jana Ryby. Wo instrumentalny přewod postara so orchester Serbskeho ludoweho ansambla, jako solisća-wokalisća wustupichu studenća Praskeje akademije muziskich wuměłstwow Kristýna Grösslerová (sopran), Natálie Zmrhalová (alt), Jan Tejkal (tenor) a David Malát (bas), a to raz sami, raz w dueće, raz w kwarteće. Připosłucharjo mytowachu wukon wšitkich sobuskutkowacych z dołho trajacym přikleskom a wudobychu sej tak wospjetowanje finalneho „Communio“ kompozicije jako přidawk.