Změna strukturow tež při rewitalizaciji rěče: Team ZARI so na puć podał

Budyšin (SN/mb). „W spočatku bě słowo“, je sćenik Jan swoje poselstwo zahajił, kiž hody wosebitu rólu hraje. Serbske słowo je za čas industrializacije, tak trochowaše Marko Suchy před lětomaj w „Lausitzer Rundschau“, wjac hač tři štwórć swojich nošerjow přisadźiło. Nětk je so „team ZARI“ z projektnej managerku Dianu Pawlikowej a projektnej sobudźěłaćerku Cordulu Ratajczakowej na puć podał, tomu dopomhać, proces za­wróćeć. Zaměr je: sto tysac serbowacych w lěće 2100. A hladajo na to, zo je rěč najwažniše znamjo identity našeho ludu, móhło to tež rěkać: sto tysac Serbowkow a Serbow. Suchy so w lěće 2020 nadźiješe, zo móhła tuchwilna změna strukturow prěnja w stawiznach być, kiž rozrostej serbowanja polěkuje.