Słowo lěta z „potencialom, so do rěce wšědneho dnja integrować“

Budyšin (SN/bn). „Pomazanka“ je Hornjoserbske słowo lěta (HSSL) 2022. Zhromadne wopřijeće za wšo, z čimž móžeš sej pomazku pomazać, so drje lědma w słownikach namaka – pytaš-li za přełožkom němskeho „Brotaufstrich“, wujewja so wuraz „chlěbowy maz“; soblex žadyn přełožk njeposkićuje –, so pak po wopodstatnjenju anonymneje zapodawarki/anonymneho zapodawarja namjeta „po začuću mjeztym jara husto wužiwa, wosebje tež ertnje“.

„Pomazanka“ bu z dohromady něhdźe 35 procentami hłosow wuzwolena. Na druhim městnje slěduje wopřijeće „Serbski dener“ ze 27 procentami, „bronzu“ zdoby sej słowo „křižerka“ z něhdźe 18 procentami. Sćěhuja wurazy „pućrubar/pućrubarka“ (6 procentow), „astrofyzika“ (4 procenty), „trut/truta (3 procenty) a „swětłownja“ (2 procentaj). Za wopřijeći „dźewjećeurowski tiket“ a „hiphopowc/hiphopowča“ hłosowachu 1,5 procentow, „płunowy wotedawk“ na poslednim městnje lisćiny dohromady dźesać namjetow docpě 1 procent.