Jubilejne koncerty na wupředatej žurli ze zahoritym wothłosom

Chrósćicy (SN/bn). Pod hesłom „Serbske bands & fans“ je towarstwo Pawk dohromady 700 wopytowarjam a 100 sobuskutkowacym minjeny pjatk we wupředatej Chróšćanskej wjacezaměrowej hali „Jednota“ ke kóncej lěta wulki hudźbny wjeršk wobradźiło. „Sym přewšo spokojom. Nalada bě wulkotna, nawal hoberski. Hladajo na wopytowarstwo směm rjec, zo je so nam zešlachćiło, hosći kóždeježkuli staroby z cyłeje Łužicy přiwabić. Zdobom móžachmy pokazać, zo su ‚Pawkojo‘ nadal aktiwni, mnozy wopytowarjo so na našim stejnišću wo našim skutkowanju wobhonichu, wjacori z nich chcedźa našemu zjednoćenstwu přistupić“, předsyda zarjadowaceho towarstwa Jakub Wowčer zjima. Hłowny organizator Syman Hejduška podšmórny, zo je so „wulka próca wšitkich na jewišću a za nim skutkowacych wudaniła. Njejsmy z tym ličili, zo budźe zajim za zarjadowanje tak sylny. Dźiwam so, kak spěšnje běchu wšitke tikety rozebrane. Pokročowanje je definitiwnje opcija.“