Prěnje zarjadowanje Zwjazka serbskich wuměłcow (ZSW) w nowym lěće bě zdobom zakónčenje wjace hač 24 měsacow trajaceje přestawki. We wobłuku mjeztym hižo sedmy raz wuhotowaneje literariskeje rozmołwy rjadu „tracTare“ diskutowachu minjeny pjatk něhdźe dźesać zajimcow w Budyskej Röhrscheidtowej bašće wo antologiji „Paternoster 9“.
Budyšin (SN/bn). Jako zazběh do diskusije poda Dietrich Šołta kompaktnu recensiju, wuzběhnywši wosebje „elegantne wuhotowanje“ knihi, wo kotrež bě so Isa Bryccyna postarała, a chwalo na přikład „žortne limericki w bjezporočnej serbšćinje z pjera Damiana Dyrlicha“, poetiske přinoški Źil-Francis Ketlicojc, Pětra Dźisławka a Maksa Bagańca kaž tež „derje pisanu“ prozu Patricije Kralec. Přitomnymaj awtoromaj Clemensej Bobce a Annamarje Zahonowej wobswědči wón „emocionalnje hnujace ekspresiwne sady“ resp. wurjadne „wopisowanje žiwjenskich wobstejnosćow z optimistiskim widom na woprawdźitosć“.
