Po loni jeničkim, ryzy wirtuelnje wuhotowanym zarjadowanju chce pianistka Heidemarja Wiesnerec swoje „Wosebite koncerty na spočatku lěta“ lětsa zaso na dohromady pjeć jewišćach w třoch zwjazkowych krajach a z publikumom wuhotować. Wospjet wopřijima program wjacore prapremjery twórbow serbskich komponistow.

Berlin (SN/bn). Zazběh twori koncert sobotu w 19 hodź. w Lipšćanskim Domje Schumanna. Slěduja prezentacije w Berlinskim Murjowym muzeju (15. januara), w Choćebuskej Wuměłstwowej hali Łužyca, w Budyskim Serbskim muzeju kaž tež na Wojerowskim hrodźe (20., 21. resp. 22. januara). Njedźelne zarjadowanja startuja stajnje w 16 hodź., hewak započinaja so stajnje w 19.30 hodź. Nimo Wiesnerec, kotraž koncertny rjad mjeztym 27. raz organizuje, zahudźa Christina Bylow na obowje a na jendźelskim rohu, Peter Jarchow na klawěrje a Mark Chaet na huslach. Wo dwurěčnu moderaciju postara so rozhłosownik Gregor Kliem.