Po „njesměrnje napinacymaj lětomaj“ chce Serbski ludowy ansambl ptači kwas zaso na zwučene wašnje ducy po Łužicy prezentować. Wječorny program budźe „absolutny nowum“.

Budyšin (SN/bn). „Leć ze mnu“, kaž programej za dźěći rěkaja, chcedźa 19. januara prěni raz předstajić, a to „po třoch lětach trajacym přetwarje zaso na našej žurli w Budyšinje“, kaž intendant domu Tomas Kreibich-Nawka na wčerawšej nowinarskej rozmołwje w Röhrscheidtowej bašće sprjewineho města podšmórny. Režijnu asistentku inscenacije Kristinu Nerád dopomina kruch „na dramu ‚Romeo a Julija‘, ale z dobrym wukóncom“. Libreto je spisała Cornelia Just, kotraž produkciju jako hóstna režiserka wuměłsce nawjeduje. Tohorunja jako hosćej buštaj komponist Andreas Grundlach a wuhotowar Tom Böhm angažowanaj.