Literarny projekt LND njelochki přichod serbskeje towaršnosće tematizuje
Budyšin (SN/at). Serbska towaršnosć trjeba orientaciju za palace prašenja přichoda. Hač móža to hižo wotmołwy być abo wostanu to skerje nastorki do rozmyslowanja, to tuchwilu nichtó njewě. Ludowe nakładnistwo Domowina (LND) chce z nowym projektom forum za to skićić, mjezyserbskej wuměnje polěkować.
Nastać ma zběrnik esejistiskich tekstow. Po naročnym časowym planje měł wón klětu nazymu doćišćany a jako e-book předležeć. Wudawaćelka tuteje edicije je Marka Maćijowa, bywša jednaćelka LND. Wona wšitkich, „kiž so z přitomnosću serbskeje towaršnosće kritisce zaběraja, zamołwitosć začuwaja a produktiwne ideje za přichod maja“, namołwja, so pjera jimać a ze swójskim tekstom k wuspěchej předewzaća přinošować.
Něhdźe 50 zajimčow a zajimcow – mjez nimi su basnicy a spisowaćeljo, wuměłče a publicisća, wučerki a žurnalisća, wědomostnicy a duchowni – staj Marka Maćijowa a za wudaće zamołwity lektor Pětr Thiemann takrjec přeprosyłoj, zo bychu so z nimaj do projekta dałoj.