Wobdźělnicy prózdninskeho kursa SLA z „jónkrótnym koncertom“

Budyšin (SN/bn). „Dorost wužadować a spěchować słuša k bytostnym stołpam filozofije Serbskeho ludoweho ansambla. Wospjet wjetša ličba wobdźělnikow mjeztym třećeho ‚Prózdninskeho lěhwa z instrumentom‘ pokazuje, zo smy na dobrym puću.“ Takle zjimaše intendant SLA Tomas Kreibich-Nawka minjeny pjatk wosebity ferialny kurs za šulerki a šulerjow, w kotrehož wobłuku bě cyłkownje 22 wobdźělnikow z cyłeje Łužicy wot jutrowneje póndźele hač do minjeneho štwórtka w Budyskej młodowni dohromady šěsć hudźbnych kruchow nazwučowało. „Dźensa prezentujemy wuslědki kursa. Dožiwiće takrjec jónkrótny koncert: Sadźby na zakładźe serbskich ludowych kaž tež wuměłskich spěwow z kompozitoriskeho pjera Christopha Reuthera dźě buchu ekstra přizjewjenym instrumentam wotpowědujo spisane a zaklinča tuž prěni a w tejle formje zdobom najskerje posledni raz“, intendant podšmórny.