„Filmowe stajne blido“ ze zazběhom wustajeńcy kulturneho herbstwa

Drježdźany (SN/bn). We wobłuku tele dny wotměwaceho so 35. Drježdźanskeho filmoweho swjedźenja stej Filmowy zwjazk Sakska a Serbsko-němska syć Łužycafilm wčera mjeztym třeće „Filmowe stajne blido“ na Klempererowej žurli Sakskeje krajneje a uniwersitneje biblioteki SLUB wuhotowałoj. Pod hesłom „Kurze Lausitzer – krotke Łužyske – krótke Łužiske“ prezentowachu štyri krótkofilmy „Gólska roža“ režiserki Frauke Rahr, „Hinterberg“ Erika Šyški, „Křižerki“ Sofije Cyžec“, a „Fragmenty“ Romana Pernaka. Nimo toho pokazachu hudźbne widejo „Śi wiźim“ Erika Šyški a Gregora Kliema. Rozhłosownik Hellmuth Henneberg wodźeše jako moderator po programje, předstajiwši něhdźe 40 wopytowarjam witu wobdźělenych filmowčow a filmowcow a nastorčiwši prašenja z publikuma.