Ludowe nakładnistwo Domowina z atraktiwnym stejnišćom na knižnych wikach wuspěšne

Lipsk (CS/SN/mb/MiR). Z dobrej rezonancu publikuma su so Lipšćanske knižne wiki njedźelu zakónčili: 274 000 wopytowarjow bě přichwatało, nimale tak wjele kaž na poslednich knižnych wikach w Lipsku do korona-přestawki 2019. Mjez 2 082 wustajerjemi ze 40 krajow prezentowaše so Ludowe nakładnistwo Domowina (LND) w hali 2 w bliskosći znatych wulkich nakładnistwow. Jednaćel LND Syman Pětr Cyž so wjeseleše, zo su štyri dny dołho mnozy zajimcy składnosć wužiwali, sej hnydom knihi kupić. Wosebje woblubowana běše dwurěčna prěnička „Pyšpot procha – in Sand und Wolken geschrieben“ delnjoserbskeje basnicy Jill-Francis Ketlicojc alias Źilka, kotraž bu sobotu dopołdnja z čitanjom předstajena. Po tym je Źilka wězo předate knihi signowała. Ale tež wšelakore němskorěčne edicije wo Krabaće a wobrazowe zwjazki su ludźo rady kupili.