Muzejownicy so w Zagorju zetkali

wutora, 23. junija 2015 spisane wot:
Zagor (AP/SN). Rjemjesło wokoło Mužakowa bě tema lětušeho zetkanja dźěłoweho kruha Łužiske muzeje a muzealne zarjadnišća Maćičneje sekcije ludowěda/muzejownistwo. W Zagorskim muzeju rjemjesła a přemysła zeńdźe so wčera pjat­naće zajimcow z Hornjeje a Delnjeje Łužicy. Předsyda spěchowanskeho towarstwa muzeja Gotthard Kreisel wo­dźeše po stajnej wustajeńcy a rozłoži najwše­lakoriše nastroje a techniki wobdźěłanja drjewa, zhotowjenja košow, šewcowstwa a dalšich. Drjewo, hlinina (Löss), železowa ruda, pěsk a brunica běchu hospo­darski zakład za wosebite rjemjesl­niske a industrijne wuwiće Mužakowskeje hole, kotrejež pěskojta rola so za ratarstwo lědma hodźeše. W přednošku „400 lět hornčerstwo kołowokoło Mužakowa“ roz­łoži fachowča Helga Heinzowa wo­sebitosće swětoznateje Mužakowskeje bruneje keramiki a přechod k industrijnej produkciji kamjeninowych tworow. Z 20 něhdyšich Mužakowskich hornčernjow njezby ani jenička, wothladajo wot dweju w Zagorju. Ćim wažniša je bohata zběrka muzeja, hdźež wustajeja tež serb­ske drasty a objekty ze wšědneho dnja holanow.
Budyšin (SN). Kotru knihu sej najradšo sobu do dowola wzać abo w měrnym ku­ći­ku na zahrodźe čitać? Starši kaž dźěći sej wo tym hłowu łamaja. A zo njeby to přećežko było, přewjedźe LND wot 29. junija do 9. julija prěni raz „doprózdninsku“ čitansku turneju po serbskich šulach Hornjeje Łužicy. Serbscy awto­rojo předstaja swoje knihi šulerjam a wabja jich tak k „dočitanju“ we wulkich prózdninach. Na dźesać čitanjach, mjez druhim w Ralbicach, we Wojerecach a Kulowje, steja wosebje nowostki w srjedźišću, tak basniska zběrka Dorotheje Šołćineje „Kupjel połna rybičkow“, kniha Křesćana Krawca „Hdźe je kóčka wostała?“, a wobrazowa kniha Thomasa Bindera „Pingufant za Pawla“. W serbskej pěsto­warskej skupinje towarstwa Stup dale w Drjež­dźa­nach podpěruje LND prócowanja star­­šich zwonka Łužicy z čitanjom za naj­młódšich. Składnostnje čitanskeje turneje wuńdźe 40stronski barbny prospekt, z kotrehož pomocu móža starši kaž tež čitarjo w poskitku serbskich dźěćacych knihow woměrje listować.

Přezpólni dobru naladu šěrili

wutora, 23. junija 2015 spisane wot:
W rjedźe koncertow a dalšich serbskich zarjadowanjow w bróžni Lichańskeho hrodu je skupina Přezpólni njedźelu popołdnju něhdźe połsta připosłucharjow na połdrahodźinskim koncerće zawjeseliła. Hromadźe z instrumentalistami zanjesechu mužojo starodawne serbske pěsnje z Delnjeje, srjedźneje a Hornjeje Łužicy. Wjesnjanka a čłonka­ zwjazkoweho sejma Marja Michałkowa (CDU) witaše spěwarjow, hudźb­nikow a publikum do přewšo rjaneho hrodu, hdźež tež mnohe pory rady swój kwas swjeća. Foto: SN/Maćij Bulank

Ansambl we Wětošowje derje wobstał

póndźela, 22. junija 2015 spisane wot:

Serbski ludowy ansambl je na hrodowych swjedźenskich hrach kónc tydźenja we Wětošowje derje wobstał. Nóc SLA z italskej hudźbu a rejemi je sej sobo­tu něhdźe 120 ludźi wobhladało.

Wětošow (PBe/SN). Arije znatych intalskich komponistow kaž Giuseppy Verdija, Gioachina Rossinija a Giacoma Puccinija stejachu sobotu w srjedźišću pro­grama SLA we Wětošowje. Sopranistka Bibiana Nwobilo a tenor Pablo Casamelle staj je zanošowałoj. Nimo spěwnych přino­škow předstaji balet ansambla tež klasiske reje a reju rjemjeslnikow, za čož přiwjezechu jednu z rejwarkow z karu na jewišćo.

Wuměłcy kaž tež hosćo běchu z wje­­čorom wjac hač spokojom. Kaž wjacori wopy­towarjo měnjachu, je Wětošowski hród hudźbnu chłóšćenku dožiwił. Wosebje wjesołaj intendantka SLA Milena Vettrainowa a Wětošowski měšćanosta Bengt Kanzler (njestronjan) běštaj, zo njeje so za čas předstajenja dešćowało a zo běchu ludźo najebać chłódne wjedro přišli. Wobaj pósłaštaj na kóncu pro­grama jako dźak hubku z ruki k njebju.

Łužiscy wuměłcy so předstajeja

póndźela, 22. junija 2015 spisane wot:
Połčnica (SN/CoR). Něhdźe 150 ludźi přiwabiło je sobotne wotewrjenje wustajeńcy „Wuměłcy Hornjeje Łužicy – w fotach a z twórbami“ do Połčničanskeje wuchodosakskeje wuměłstwoweje hale. Kulturne koło Ernsta Rietschela bě zhromadnje z Budyskim a Hornjołužiskim wuměłstwowym towarstwom přehladku organizowało, w kotrymž předstaja so 45 wuměłcow, mjez nimi Iris Brankačkowa, Isa Bryccyna, Jan Buk, Maja Nagelowa, Mario Ošika a Borbora Wiesnerec. Čornoběłe fotowe portrety, zdźěłane wot Jürgena Maćija, přehladku wudospołnjeja. W tutej formje je wustajeńca hač do 23. awgusta w Połčnicy přistupna, potom pućuja mólby, rysowanki a plastiki dale do Oelsnitza, hdźež budu wot 11. septembra do 11. oktobra we wobłuku krajneje zahrodneje přehladki widźeć. „Rady wužiwamy našich wuměłcow, zo bychmy za region wabili“, rjekny předsyda kulturneho konwenta Hornja Łužica-Delnja Šleska Bernd Lange (CDU) na wotewrjenju. Spěwarka Walburga Wałdźic a Max Loeb staj je jako duwo Mlokawka hudźbnje wobrubiłoj.

Stare a nowe skićeli

póndźela, 22. junija 2015 spisane wot:

Wo Serbskim swjedźenju w Choćebuzu

Choćebuz (MH/SN). We wobłuku Choćebuskeho měšćanskeho swjedźenja kónc tydźenja wotměchu tež lětsa na jewišću w Puškinowym parku, mjeztym 8. serbski swjedźeń. Program, kotryž je wyši měšćanosta Holger Kelch (CDU) wosobinsce wotewrěł, sahaše wot ludoweje serbskeje hač k młodej rockowej a popowej hudźbje ze srjedźneje Łužicy. Při tym běchu tež stare serbske instrumenty słyšeć­.

Anne Holzschuhojc a Christian Matthée­, zastupjerjej sćelaka RBB, běštaj dwurěčnu modera­ciju přewzałoj. Pod hesłom­ „Na mosće“ zaklinčachu mjez druhim serbske spěwy z Matthiasom Kießlingom und Peterom Vogtom. Ze sepju pisanych spěwow za­hajichu zjednoćene delnjoserbske chóry pod nawodom Geralda Schöna program. Słyšeć a widźeć pak běchu tež folkowe a rockowe štučki ze skupinu Die Folk­samen, tradicionalne ludowe reje w delnjoserbskej drasće skupiny Stara lubosć kaž tež delnjoserbski dźěćacy ansambl w swojej najmłódšej zestawje. Kapała nAund prezentowaše serbsku popowu hudźbu. Grodkowscy holanscy hercy překwapichu nimo toho ze zwukami na dudach­.

Matineja na hrodźe z aha-efektom

póndźela, 22. junija 2015 spisane wot:

Wojerecy (CRM/SN). Matineje na hro­dźe słušeja lětdźesatki do programa Wojerowskeho wuměłstwoweho towarstwa. „Wone­ předstajeja twórby swětosławnych a našočasnych spisowaćelow, přewodźane wot klasiskeje a moderneje hudźby. K tomu słušatej literatura a hudźba serbskich krajanow“, piše kulturnik Martin Schmidt k wčerawšemu zarjadowanju towarstwa.­ Přeprošenje sćěhowałoj běštaj spisowaćelka Róža Domašcyna a kom­ponist Jan Cyž z Budyšina. Za mnohich běše to wosebje zajimawe, do­kelž so jim hra ze wšelakimi rěčemi realnje předstaji. K tomu poda so jako dalša a zdobom wudospołnjaca komponenta hudźba, kotraž spyta moderne rěčne metafry na swo­jotne wašnje pohłubšić.

Wulkeho naprašowanja dla ma lětuši 4. Krabatowy festiwal wot 1. do 19. julija štyrnaće předstajenjow. Srjedu za tydźeń budźe předpremjera krucha „Krabat­ – pjeršćeń kantorki“ na terenje Čornochołmčanskeho Krabatoweho młyna. 8 400 zastupnych lisćikow bě hižo­ w běhu dweju dnjow wupředate.

Bjedrich Awgust Wićaz

pjatk, 19. junija 2015 spisane wot:
Wyši mašinotwarski inženjer a spěchowar serbskeho towarstwoweho žiwjenja Bjedrich Awgust Wićaz narodźi so 21. junija 1865 swójbje kublerja w Brězynce pola­ Delnjeje Hórki. Po třoch lětach na Bu­dyskim­ Krajn­ostawskim wučerskim seminarje studowaše wón w Mittwei­dźe mašinotwarstwo. Jako inženjer dźěłaše po tym we wšěch srjedźoeuropskich krajach a spózna na swojich pu­ćowanjach wužitnosć serbskeje maćeršćiny. Namaka při­stajenje jako technikar w Drježdźanach, hdźež měješe tež předewzaće. Wićaz a Bjarnat Krawc běštaj prěnjej zapisowarjej 1889 załoženeho towarstwa­ ewangelskich Serbow Čornobóh w sakskej stolicy. Tři lěta bě tež jeho předsyda­. 1918 pomjenowachu jeho za čestneho čłona. Wot lěta 1920 bě čłon Maćicy Serbskeje. Wićaz zawostaji wjacore rukopisne zwjaz­ki zapisow Čornoboha. Financo­waše serbske koncerty w Drježdźanach a spěchowaše wot lěta 1922 tež spěwne towarstwo Hromadnik. 15. septembra 1927 wón w Drjež­dźanach zemrě. Nekrolog­ za njeho spisa Bjarnat Krawc. Wjace hač sto Serbow jeho k rowu přewodźeše. Manfred Laduš

MDR wusyła třinarodnje

pjatk, 19. junija 2015 spisane wot:
Drježdźany (SN). Tři kraje, tři sćelaki – jedne zhromadne wusyłanje. Pod hes­łom „Hej, susodo“ hlada MDR 1 Radijo Sakska wotnětka jónu wob tydźeń zhromadnje z Čěskim rozhłosom a Radijom Wrócław poł hodźiny přez mjezy, zdźěla MDR. Mo­derator Roman Nuk chce so z kolegomaj Peterom Kumpfu z Libereca a Tomaszom Sikoru z Wrócławja wo tym rozmołwjeć, wo čimž w susodnymaj krajomaj runje rěča, so směja abo diskutuja. Premjera třinarodneho wusyłanja budźe njedźelu we 18 hodź. „Chcemy z prěnim prawi­dłownym mjezy překročacym roz­hło­sowym wusyłanjom w MDR swoju rólu jako kompetencny centrum za rozprawnistwo z pomjezneho regiona dale zesylnić“, wuzběhny direktor Sakskeho kraj­neho rozhłosa Sandro Viroli. Hižo wot spočatka lěta wusyła MDR Sachsenspiegel kóždu njedźelu powěsće „Naši suso­dźa“ w kooperaciji z čěskej a pólskej telewiziju. Dźěl wusyłanja „Hej susodo“ ma być rěčny přinošk. „‚Dobry dźeń‘ a ‚dźakuju so‘ dyrbi kóždy w rěči susoda rjec móc“, měni moderator Roman Nuk.

nawěšk

nowostki LND