Serbske mustwo – Cymbrojo z Italskeje 4:0 (2:0)

Zestawa Serbskeho mustwa: Boese – Kral, Kobelt (77. Lobeda), Šwjela, Brühl, Glode (64. Hawš), Woko, Šuliš (77. Krötel), Wałda, Bogusz (64. Domaška), Krawčik (58. Rinza)

Při słónčnym wjedrje a něhdźe 31 stopnjach bě so Serbske mustwo wokoło trenarjow Franka Ričela a Svena Ballacka wčera do Globasnicy (Globasnitz) podało. Tam wočakowaše łužiskich koparjow prěnja skupinska hra přećiwo mjeńšinje Cymbrow z Italskeje. Tuta liči jenož hišće wokoło 400 rěčnikow. Skupina něhdźe 50 serbskich fanow je daloki puć do Korutanskeje na so wzała, zo by Serbske mustwo mócnje podpěrała. Hru před Karawankowskej hórskej panoramu je sudnik Markus Piuk w 17 hodź. zahwizdał.

Globasnica/Dobrla Vas (SN/JaW). Serbske mustwo je wčera w Globasnicy (Globasnitz) z dobyćom 4:0 přećiwo Cymbram z Italskeje fulminantnje do lětušeho 4. koparskeho turněra europskich narodnych mjeńšin europeady startowało. (Čitajće wjace wo prěnjej hrě serbskich koparjow na 3. stronje.). Hižo dźensa popołdnju napoł třoch steješe za serbsku wubranku dalša hra přećiwo ­Pomakam z Bołharskeje w Šmihelu (St. Michael) na programje

Sobotu wječor bu 4. europeada we wsy Dobrla Vas (Stift Eberndorf) oficialnje zahajena. Kaž Domowinska delegacija w Korutanskej zdźěla, su Korutanscy Słowjency jako hosćićeljo europeady wšitkich swojich hosći z pisanym kulturnym programom witali. Mnozy domoródni so na wotewrjenu wobdźělichu a hosći z cyłeje Europy z mócnym přikleskom witachu. Mjeztym je tež serbska wubranka kompletna, posledni koparjo z Łužicy, kiž mějachu w swojich domjacych koparskich towarstwach hišće wažnu hru zmištrować, su mjeztym dojěli.

Awtor dźensa

Clemens Šmit

Njewěm, kak so wam dźe. Do zahajenja europeady běch poprawom tróšku skeptiski! „Budźe to něšto?“, so prašach, zhladujo na zajim a euforiju Serbow za wulki sportowy a kulturny podawk. Wulki serbski fanowy bus sej wšak lětsa do Korutanskeje žadyn dojěł njeje. A doma? Hač drje budźe public viewing, potajkim zhromadne tłóčenje palcow před wulkej wobrazowku kaž w Radworju, Chrósćicach abo we Wotrowje dosć derje wopytany? Kaž pak sym dźensa rano zhonił, běše sej na wšitke tři zarjadowanja wčera dosć ludźi dóšło. W Radworju je so na přikład něhdźe 50 ludźi zetkało, zo bychu sej prěnju hru Serbskeho mustwa wobhladali.

Kónčne hry w Großröhsdorfje

Zapadołužiski koparski zwjazk (WFV) wuhraje dźensa, jutře a njedźelu w Großröhrsdorfje w Rödertalstadionje kónčne hry wo wokrjesny pokal.

24.06. 19.00 HZ Wojerecy –

  Módro-běli Kulow

  (stari knjezojo)

25.06. 13.00 TSV Połčnicy 1920 –

  Módro-běli Kulow

  (młodźina B)

25.06. 16.00 Natwar Němske Pazlicy –   Wojerowski FC (mužojo)

26.06. 11.00 HZ Rakecy –

  HZ Hodźij 04

  (młodźina C)

26.06. 13.30 HZ Hnašecy/Dobruša –

  TSV Połčnicy 1920

  (młodźina A)

Jěchanski a skakanski turněr

Jubilejny połstaty jěchanski a skakanski turněr loni w Kulowje w tajkim wulkim ramiku, kaž sej jón přejachu, přewjesć móhli njejsu. Tuž rěka turněr lětsa 50 dypk 1. 25. a 26. junija steja we wubědźowanskich planach pruwowanja w skakanju hač do klasy M a pruwowanja w dresurje hač do klasy L. Prěni raz změja w Kulowje tež Hornjołužiski cup. Sobotu wubědźuja so wot dopołdnja 10.15 hodź. hač do popołdnja štyrjoch, njedźelu hižo wot ranja wosmich do wječora šesćich.

Live-wusyłanje hrow