Zapadołužiski koparski zwjazk (WFV) ma wotpohlad, wot sezony 2020/2021 na polu žónskeje kopańcy uniju z Koparskim zwjazkom Hornja Łužica (FVO) wutworić. Doskónčne rozmołwy wo tym tele dny wjedu a wuslědki zjednoćenstwam potom sčasom zdźěla.
Slědowace mustwa koparkow su za planowany hrajny modus přizjewjene: ze Zapadołužiskeho koparskeho zwjazka ST Hnašecy-Dobruša, Zeleno-běłe Bukecy a ST 1859 Wjernarjecy; z Koparskeho zwjazka Hornja Łužica LSV Friedersdorf, Módro-běłe Obercunnersdorf, Zeleno-běłe 90 Uhsmannsdorf a SV Zodel 68.
WFV ma tež zwonka wokrjesa w žónskej kopańcy dwaj cyłkaj zastupjenej. Biskopičanske KT startuje dale ze swojim prěnim žónskim mustwom w regionalnej lize Sewjerowuchodneho koparskeho zwjazka (NOFV). K tomu sćele nowozestajane druhe zastupnistwo do krajneje klasy na hońtwu za wrotami. Koparki Hlinowskeho SC rozžohnuja so z małym hrajnišćom na wokrjesnej runinje. Wone chcedźa so na wulke hrajnišćo zwažić a tak na krajnu runinu. Lěta dołhe dobre dźěło w dorosće zjednoćenstwa to nětko zmóžni.
Wólnočasnu ligu zapřijeć
Nětko so kulowata koža zaso kula, tež na wulkim europskim jewišću. Champions league a Europa league z hrajnej dobu pokročujetej – prěni króć w stawiznach pak z nowym, tak mjenowanym turněrowym modusom. Mam to za prawy rozsud. Snano přewozmu modus wot štwórćfinala tež za přichodne lěta.
Prěnje małe překwapjenki smy hižo dožiwili. Tak je za italskeho mištra a sobufaworita Juventus Turin z Cristianom Ronaldom turněr hižo zakónčeny, tež za němskeho koparja Tonija Krossa w rjadach Reala Madrid. Manchester City bě so přećiwo Madridej přesadźił a słuša nětko za finalny turněr w Lissabonu ke kruhej faworitow na titul. Tež RB Lipsk je so za finalne wubědźowanja kwalifikował. Bohužel pak dyrbi bjez Tima Wernera nastupić. Wón njebudźe wotchada ke klubej Chelsea London dla sobu hrać.
Pytaja dalše testowe wosoby
Za studiju „restart-19“ Uniwersity Halle je so dotal 1 384 za trěbnych 4 200 wosobow přizjewiło. Tež sportowče a sportowcy chcedźa so mjenujcy spěšnje zaso k normaliće wróćić. Tohodla podpěruje TeamSportSachsen slědźerski projekt „restart-19“, zaběracy so z rizikom natyknjenja z koronawirusom. 4 200 młodych a strowych wobdźělnikow móže so za simulaciju zarjadowanja w Lipsku přizjewić. Slědźerski projekt „restart-19“ Uniwersity Halle ma zaměr, riziko natyknjenja z wulkozarjadowanjom w hali simulěrować a při tym wuměnjenja přeslědźić, pod kotrymiž hodźeli so wulkozarjadowanja najebać pandemiju přewjesć, bjeztoho zo by ludnosć wohrožena była. Studija přewjedu 22. awgusta wot 8 do 18 hodź. www.restart19.de
Koparske testowe hry
07.08. 18:30 SJ Chrósćicy –
HZ Łaz/Běły Chołmc
08.08. 11:30 FSV Oderwitz 02 –
FSV Budissa Budyšin
08.08. 14:00 FC Grimma –
Jednota Kamjenc
08.08. 14:00 SJ Njebjelčicy – Lok Slepo
08.08. 14:00 Traktor Malešecy –
ST Bart 90
09.08. 12:30 SJ Chrósćicy II –
Zeleno-běli Sepicy
09.08. 14:00 ST Hbjelsk –
ST 1922 Radwor
09.08. 15:00 SJ Chrósćicy –
FV Biskopicy II
Druhi Hornjołužiski trail
Krajna koparska liga a krajne klasy Sakskeho koparskeho zwjazka (SFV) kaž tež ligi a klasy w teritoriju Zapadołužiskeho koparskeho zwjazka startuja 5./6. septembra 2020 zaso do winowatostnych koparskich hrow. A tu su nowe zestawy jednotliwych ligow.
regionalna liga muži: Lok Lipsk, Berlinski AK, BFC Dynamo, BSG Chemija Lipsk, Biskopičanske KT, Kamjeničanski FC, FC Carl Zeiss Jena, FC Energija Choćebuz, FSV 63 Luckenwalde, Optik Rathenow, Union Fürstenwalde, Hertha BSC II, SV Babelsberg, SV Lichtenberg 47, Tennis Borussia Berlin, VSG Altglienicke, VfB Auerbach, Germania Halberstadt, Viktoria Berlin, ZFC Meuselwitz
regionalna liga žonow: 1. FFV Erfurt, Biskopičanske KT, USV Jena II, FC Phoenix Lipsk, Magdeburgski FFC, RB Lipsk II, Přezjednota Lipsk-juh
FC Energia Choćebuz
– FK Varnsdorf 0:2 (0:0)
Zestawa domjacych: Stawecki (46. Stahl) – Fl. Brügmann, Storb (62. Jarosch), Koch, Hasse, Pelivan, Erlbeck, Mäder (62. F. Geisler), Gladrow (62. N Geisler), Kremer (62. Hoppe), Fe. Brügmann (62. Stettin)
Z FK Varnsdorfom je sej regionalny koparski ligist FC Energija Choćebuz w susodnej Čěskej dwě klasy wyše hrajace mustwo do Łužicy přeprosył. A te je so w Stadionje přećelstwa, kotryž běše hač na někotrych zastupjerjow medijow nimale prózdny, hrajersce jako wjele lěpši cyłk wopokazało. Zajimcy móžachu sej jeničce přez livestream „Energie-TV“ hru wobhladać. Wjele wjesela pak při tym njemějachu, dokelž jim domjacy wjele zwjeselaceho njeposkićichu. Češa škitarjow Energije chětro nadběhowachu. Samo jako sej ći bul wuwojowachu, njeda jich přećiwnik do bliskosće swojeje šěsnatki. Jeničkej třělwje na wrota poradźištej so w prěnim połčasu nowopřichadomaj Maxej Kremerej, kiž bě tydźenja wot SV Meppena přišoł, a Ricej Gladrowej.
SG Großnaundorf
– SJ Njebjelčicy 6:2 (3:0)
Zestawa hosći: Hahn – Matješk, Kral, Hanuza, Hoelzel, Haška, Korjeńk, F. Ričel, Reinelt, Fl. Domš, O. Domš, Čornak, Reineke, Lejnart, Plaettner
Po tym zo běchu koparjo Njebjelčanskeje SJ zaso tydźensce pod dowolenymi wuměnjenjemi zwučowali, je so trenar Handrij Krawčik na testowu hru njedźelu dopołdnja ze spřećelenej SG Großnaundorf dojednał. Dokelž tamniše hrajnišćo tuchwilu ponowjeja, zetkachu so na tohorunja rjanym lěsnym trawniku w Lomnitzu. Jedyn aktiwny hrajer je prěnje mustwo sportoweje jednotki wopušćił. Franz Gödig je so nětko po lětomaj w Njebjelčicach z powołanskich přičin zaso Njeswačidłu přizamknył. Dokelž pak pobrachowaše Njebjelčanskemu trenarjej tónraz z wjacorych přičin pjeć aktiwnych (Pawlik, Wagner, Šołta, Malaškin, Hrjehor), zapřija wón młodeho nadběhowarja Marwina Reineku. Wón bě so na treningowych jednotkach derje prezentował.
ST Marijina hwězda
– ST Ćisk 2:0 (1:0)
Zestawa domjacych: O. Schmidt, Matik – Wróbl, Zelnak, R. Hawš, R. Cyž, Peschmann, Pjetaš, Ch. Cyž, P. Schmidt, Pakoßnick, Jurš, Eldor, Pa. Lugge, Lipič, Pi. Lugge, Langer, Čornak