Před měsacom su zamołwići hišće jedne z najwažnišich prašenjow wokoło europeady rozrisali – mjenujcy kriterije, po kotrychž kader za wulki koparski turněr wupytaja. To běše wšěm potencielnym hrajerjam hišće raz pohon, w přichodnych měsacach a tydźenjach so za njón profilować. Coronakrizy dla pak budźe europeada hakle w juniju 2021. Kak zamołwići na to reagowachu a kotre ćeže na Clemensa Škodu, hłowneho łužiskeho organizatora čakaja, je wón Jurjej Bjeńšej powědał.
Nětko budźe europeada tola wo lěto přesunjena. Zrudźa Was to?
C. Škoda: Trochu zrudny sym, haj! Ale přewažuje skerje jasnosć, zo wěmy, kak dale póńdźe.
Sam byšće zawěsće tež tak rozsudźił, abo?
C. Škoda: Haj, wězo! To je absolutnje prawy rozsud!
Kak su koparki, koparjo a dalši oficialni na to reagowali?
C. Škoda: Kontakt k hrajerkam abo hrajerjam hišće měł njejsym, ale tež we wuběrku maja wšitcy zrozumjenje za rozsud, wšako smy z tym ličili.
Změje přestorčenje sćěhi na serbsku wubranku?