Argentinska finale lětstotka dobyła

póndźela, 19. decembera 2022
artikl hódnoćić
(0 )
Argentinske narodne mustwo kołowokoło sławneho koparja Lionela Messija je swětowy koparski mišter lěta 2022.  Foto: pa/AP/Martin Meissner Argentinske narodne mustwo kołowokoło sławneho koparja Lionela Messija je swětowy koparski mišter lěta 2022. Foto: pa/AP/Martin Meissner
Koparskej wubrance Argentinskeje a Francoskeje postaraštej so wčera wo jedyn z najbóle napjatych finalow w stawiznach swětoweho mišterstwa. Po 3:3 w 120 mjeńšinach přewinychu Južnoameričenjo Francosku hakle w třělenju jědnatkow. Lionel Messi krónuje z tym swoju karjeru z titulom pola WM. 35lětny bě sylnych Argentinjanow z jědnatku k nawjedowanju wjedł (23.). Krasnje přez Messija a Mac Allistera wuhraty konter přetwori Di María při dołhej žerdźi k 2:0 (36.). Argentinska měješe dołho wšitko w ruce, wot Francoskeje přińdźe w ofensiwje mało. Jako bě partija nimale hižo rozsudźena, docpě Kylian Mbappé najprjedy přez jědnatku přizamknjenske wrota (80.) a dwě mjeńšinje pozdźišo samo hru hišće wuruna. 2:2 bě zdobom kónčny staw po regularnym hrajnym času. W podlěšenju trjechi potom zaso Messi (109.), prjedy hač Mbappé dwě mjeńšinje do kónca znowa přez kop z jědnaće metrow wuruna. Finale swětoweho mišterstwa móžeše so jenož hišće w třělenju jědnatkow rozsudźić. Superstaraj činještaj započatk. Najprjedy bě to Mbappé, kotryž Emiliana Martíneza ­přewiny, potom Messi přećiwo Hugo ­Llorisej wuruna.
wozjewjene w: Sport
Prošu přizjewće so, chceće-li komentar podać

Serbska debata

nowostki LND