W němsko-danskim pomjeznym kraju blisko Flensburga přewjedźe so wot 28. junija do 7. julija 2024 zaso Europeada. Po premjerje w lěće 2016 w Južnym Tirolu w Italskej chce so serbska koparska wubranka žonow (skwž) tež klětu na koparskich europskich mišterstwach awtochtonych narodnych mjeńšin wobdźělić. Zo by so mustwo zesylniło a zaso znowa zestajało, bě so sobotu prěni zazběhowy trening respektiwnje turněr w Ralbičanskej sportowni přewjedł. Dohromady 16 holcow a žonow w starobje mjez 13 a 40 lět je přeprošenju sćěhowało a so na treningu wobdźěliło. Hłowny trenar Pětr Bejmak holcy a žony powita a předstaji na započatku zamołwitych a organizatorow kadra. Bejmakej poboku budźe kotrenar Handrij Rachela z Noweje Wjeski, trenarka za wrotarki Jadwiga Richterowa z Worklec a mustwowa nawodnica Franciska Hellnerowa z Noweje Wjeski.