Powěsć wo Kulowskim hospodarskim planje je zašły tydźeń snano toho abo tamneho zadźiwała. Městačko wšak je jedna z našich wjetšich komunow. Přewjele pjenjez dla pak tež tam skoržić njemóža. Ćim bóle mje zadźiwa, zo chcedźa lětsa ležownostnej dawkaj A kaž tež B znižić. W zašłych lětach znaješe wuwiće tohole dawka jenož jedyn směr: horje.

Pozadk je reforma ležownostneho dawka. Po njej dyrbja mnozy wjace ležownostneho dawka płaćić hač w minjenych lětach, dokelž so hódnota jich ležownosće wotnětka hinak wobliči. Tuž cyłkowne dochody komunow w tymle wobłuku přiběraja. Kulow reaguje na to z tym, zo sadźby nětko zniži. Za wulki dźěl wobydlerjow to woznamjenja, zo drje dyrbja přeco hišće wjace dawkow płaćić hač do reformy, přiwšěm pak je to tróšku mjenje, hač bychu po starych sadźbach płaćić dyrbjeli. Tak wostanu cyłkowne dochody z tohole dawka za město konstantne. Runočasnje spjelnja město z tym wočakowanje zwjazkoweho knježerstwa z lěta 2023, po kotrymž maja dochody z ležownostneho dawka po reformje někak samsne wostać kaž do toho.